ნინი ცნობილაძე: "მამაკაცებს ჩემი გულგრილობა აშინებს"
20 წლის მომღერალი ნინი ცნობილაძე კონკურს "ახალი ტალღის" წინაშესარჩევი ტურის შედეგის მოლოდინშია. თბილისში ჟიურიმ ის და სალომე ქათამაძე აირჩია, კიევში კი მწვანე შუქი სალომეს აუნთეს, თუმცა კონკურსის ორგანიზატორებმა წელს საქართველოსთან მიმართებაში შესაძლოა გამონაკლისი დაუშვან და ჩვენი ქვეყნიდან მაყურებლის წინაშე ორივე წარდგეს. ჟიურის წევრების შეფასებები ნინის მიმართ მართლაც ძალიან მაღალი იყო – კიევში მას მომავალი მსოფლიო ვარსკვლავი უწოდეს.
– ნინი, როგორ აღმოჩნდით "ახალი ტალღის" შესარჩევ კონკურსში – თავად გადაწყვიტეთ, ვინმემ გირჩიათ თუ შეთავაზება მიიღეთ?
– ჩემმა პროდიუსერმა ნატო დუმბაძემ გადაწყვიტა, რომ ამ კონკურსში მიმეღო მონაწილეობა. საქართველოში წინაშესარჩევ ტურში, თუ არ ვცდები, 30 მომღერალი ვმონაწილეობდით, ყველანი ძალიან მაგარი კონკურსანტები იყვნენ. რამდენიმეს გარდა, თითქმის ყველა ცნობილი სახე იყო, მათ შორის – მაგდა ვასაძე, თაკო გაჩეჩილაძე, მიშა სულუხია, თემო საჯაია, მარიამ კახელიშვილი, ანი ხანჩალიანი. ნინი წიკლაური და ოთო ნემსაძე დუეტით წარდგნენ.
– ვინ იყვნენ საქართველოში ჟიურის წევრები, რომლებმაც თქვენსა და სალომეზე შეაჩერეს არჩევანი?
– ალექსანდრ რევზინი, ვალერი მელაძე, ნანი ბრეგვაძე, დუეტი "ჯორჯია", სოფო ხალვაში და რუსა მორჩილაძე. ამ ადამიანებმა გადაწყვიტეს, რომ მე და სალომე წავიდოდით იურმალაში. ამ ტურიდან ზუსტად 2 დღეში კიევში გავფრინდით, ფიქრისთვის დროც კი არ გვქონდა. რეპერტუარის შერჩევაც ძალიან სწრაფად მოხდა. საბედნიეროდ, ყველაფერმა კარგად ჩაიარა.
– უცხო ქვეყნის პუბლიკის წინაშე წარდგომა ალბათ განსხვავებულ ემოციებს უკავშირდება, აქამდე ხომ მხოლოდ ქართველი მაყურებლისთვის მღეროდით.
– უცხო ქვეყანაში, უცხო გარემოში ვიყავი, უცხო საზოგადოება მისმენდა, მაფასებდა და ეს ემოციები იყო ძალიან კარგი. მოდიოდნენ და კომპლიმენტებს მეუბნებოდნენ, აღფრთოვანებას გამოხატავდნენ.
– ჟიურის წევრებიდან ყველაზე მეტად ვისი გეშინოდათ?
– ჩემთვის ყველაზე მნიშვნელოვანი ამ კონკურსის დამაარსებლის, იგორ კრუტოის შეფასება იყო.
– რა გითხრათ იგორ კრუტოიმ?
– სიმართლე გითხრათ, მის ასეთ რეაქციას არ ველოდი. რამდენადაც ვიცი, ის შეფასებისას თავის ემოციებს დიდად არ გამოხატავს. ჩემ მიმართ ძალიან თბილი დამოკიდებულება ჰქონდა. როგორც კი შესარჩევი ტური დამთავრდა, დამიძახა, სცენიდან ჩამომიყვანა და ძალიან თბილად მესაუბრა, დეტალები ამიხსნა. მის მიმართ ძალიან დადებითად განვეწყვე. მართლა არ მეგონა, ასეთი ადამიანი თუ იყო. მისგან თბილი, ადამიანური დამოკიდებულება ვიგრძენი.
– ჟიურის დანარჩენი წევრებისგან თუ მიიღეთ კომპლიმენტები?
– საკმაოდ ბევრი კომპლიმენტი მივიღე და კარგ ხასიათზე დავდექი. არ მინდა, ხმამაღალ ნათქვამად ჩამეთვალოს, მაგრამ იქ მყოფებმა და ჟიურის ფარულმა წევრმაც მომავალი მსოფლიო ვარსკვლავი მიწოდეს. ჩემი ხმის ტემბრს და ინდივიდუალიზმს ხაზი გაუსვეს. სხვათა შორის, როცა იკითხეს, იურმალას მაყურებელს გამორჩეულად ვინ ახსოვდა, უკრაინელი ჯამალა და დუეტი "ჯორჯია" დაასახელეს. ჩემზეც ამბობდნენ, რომ ინდივიდუალური მომღერალი ვარ, მსმენელს დავამახსოვრდებოდი და კონკურსს აუცილებლად ვჭირდებოდი.
– თუმცა არჩევანი მაინც სალომე ქათამაძეზე გააკეთეს და, რამდენადაც ვიცი, თქვენ რეზერვში ხართ. ეს რას ნიშნავს, აგვიხსენით.
– "ახალი ტალღის" ორგანიზატორების გადაწყვეტილებით, საქართველოდან ორი კონკურსანტი, მე და სალომე წავედით. პატარა ქვეყნებიდან ერთზე მეტი კონკურსანტი არასდროს გაჰყავთ. ჩვენს შემთხვევაში კი ამის პრეცედენტი დაუშვეს. პატარა ქვეყანაში ორი სხვადასხვა ჟანრის მომღერალი აღმოაჩინეს. საორგანიზაციო ჯგუფს სურვილი აქვს, რომ ამ კონკურსზე ორივე მოვხვდეთ. წინაშესარჩევ ტურში კიდევ რამდენიმე ქვეყანამ უნდა მიიღოს მონაწილეობა. თუ კონკურსნატებში ჩემი ტემბრის მქონე მომღერალი აღმოჩნდება, ორ ერთნაირ მომღერალს კონკურსზე ვერ გაიყვანენ. თუ არ ვცდები, ყაზახეთი და მოსკოვი დარჩა და თუ ჩემნაირი ხმის კონკურსანტი იქაც ვერ აღმოაჩინეს, მეც მივიღებ მონაწილეობას.
– არადა, როცა პროექტ "ახალ ხმაში" მონაწილეობდით, სწორედ თქვენს ტემბრს აკრიტიკებდა ბევრი.
– ჩემთვის სასაცილოა ფრაზა: "დაყენებული ხმა". არ ვიცი, ეს რას ნიშნავს. ვინც თვლის, რომ ჩემი ხმა დაყენებულია, დაელაპარაკოს იმ ჟიურის, ვინც მომისმინა და ვისგანაც ასეთი შეფასებები მივიღე. ის ადამიანები პროფესიონალები არიან, რომლებიც ჩემი მონაცემებით გაოცებული დარჩნენ. ალექსანდრ რევზინმა მკითხა, თუ რომელი მუსიკალური სასწავლებელი მქონდა დამთავრებული და ჩემს პასუხზე, რომ თვითნასწავლი ვარ, გაოცდა. ვოკალის პედაგოგთან არ მივლია, ეს უფლის ნაჩუქარი ხმაა. მადლობელი ვარ არაჯანსაღი კრიტიკისთვის, საქმეს უფრო მეტი ენთუზიაზმით შევუდგები.
– ჟიურის ასეთი შეფასებების შემდეგ ალბათ უფრო მეტად დაგწყდებათ გული, კონკურსზე რომ ვერ მოხვდეთ.
– არა, რადგან ამ კომპლიმენტებმა იმდენად ამავსო, შემდეგ ტურში რომც ვერ გადავიდე, არ ვინერვიულებ. ასეთი შეფასებების მიღება უკვე ძალიან დიდი წარმატებაა ჩემთვის. ასეთი დიდი მასშტაბის კონკურსზე არასდროს გავსულვარ, ამიტომ გულდასაწყვეტი არაფერია. სალომე ქათამაძის მამა მოძღვარია, რომელიც ჩვენ მხარდასაჭერად იქ იმყოფებოდა. თუნდაც როცა ასეთი ადამიანი გქომაგობს, გული რაზე უნდა დაგწყდეს? სალომეს მამამ დაგვლოცა, ასე რომ, ყველაფერი კარგად იქნება.
– როგორი მეგობრული ურთიერთობაც უნდა გქონდეთ სალომესთან, მაინც ერთმანეთის კონკურენტები აღმოჩნდით. რაღაც უხერხულობის გრძნობა თქვენ შორის არ იყო?
– არა, როგორც ჟიურის წევრები ამბობდნენ, ჩვენ ერთმანეთისგან ისე განვსხვავდებოდით, როგორც ცა და დედამიწა. ის მომენტი არ მქონია, რომ სალომეს ვეჯიბრებოდი. ჩვენ აბსოლუტურად სხვადასხვა ჟანრს წარმოვადგენთ. სალომეს კონკურენტად არ აღვიქვამ, მისი შემოქმედება ძალიან მომწონს.
– როგორია საბოლოო შედეგის მოლოდინი, დაძაბული ხართ?
– ძალიან მშვიდი. საკუთარ თავზე სულ ვმუშაობ, მაგრამ იქიდან პასუხს რომ მივიღებ, მუშაობას მეტი ენთუზიაზმით შევუდგები.
– რა შეცვალა ამ შესარჩევმა ტურმა თქვენს ცხოვრებაში?
– მეტად თავდაჯერებული გავხდი, სტიმული მაქვს, რომ საქართველოში უფრო მეტი გავაკეთო.
– ამ კონკურსის გარდა კიდევ რა გეგმები გაქვთ?
– ქართულ–სომხურ მუსიკალურ პროექტში ვმონაწილეობ. სომეხი მომღერლები ქართველ კოლეგებთან ერთად დუეტებს წერენ. შემოდგომაზე კი გალა კონცერტი გაიმართება. სიმღერა უკვე გადმომიგზავნეს, რომელიც საკმაოდ საინტერესო და კარგია. იმედი მაქვს, რომ ეს სიმღერა, რომელიც ქართულ–სომხურ ენაზეა, ჰიტი გახდება. ეს პროექტი რამდენიმე ქვეყანაში გაკეთდა, კარგი და დახვეწილი კონცერტები გამოვიდა, ვნახოთ, რა იქნება.
– კარიერაში აქტიური პერიოდი გაქვთ. პირად ცხოვრებაში როგორ არის საქმე?
– პირად ცხოვრებაში არაფერი ხდება, რადგან მთლიანად კარიერაზე ვარ გადართული. ამ ყველაფრის პარალელურად ვსწავლობ, ჟურნალისტიკის მესამე კურსის სტუდენტი ვარ. თუ გეგმები შეიცვალა, უნივერსიტეტში ერთწლიან აკადემიურ შვებულებას ავიღებ და მუსიკალურ კარიერას მივხედავ.
– "ახალი ხმის" შემდეგ, რაც ხალხმა გაგიცნოთ, თაყვანისმცემელი ბიჭები მოგიმრავლდნენ?
– რა თქმა უნდა, თუმცა ჯერ ამისთვის დრო არ მაქვს. როცა შედარებით ცნობადი ხდები, ალბათ თაყვანისმცემლები გემატებიან, მაგრამ ეს ისეთი არაფერია.
– თავად როგორი ბიჭები მოგწონთ, ვინ იქცევს თქვენს ყურადღებას?
– გარეგნობას ყურადღებას კი ვაქცევ, მაგრამ აქამდე ვინც მომწონებია, ფიზიკურად კარგი არ ყოფილა. მამაკაცისკენ რაღაცამ უნდა მიგიზიდოს, მაგრამ – რამ, ამას ვერასდროს ავხსნი.
– ადვილად იხიბლებით და მოგწონთ?
– კი. შეიძლება ორ კვირაში ერთხელ მომეწონოს ვინმე, მაგრამ ჩემამდე ადვილად არ ვუშვებ. ერთი სიტყვით, ხშირად მომწონს, მაგრამ ხანმოკლე დროით.
– სერიოზულად არავინ გყვარებიათ?
– კი, როგორ არა. სერიოზულად შეყვარებული ერთხელ ვიყავი, მაგრამ იმ ყველაფერმა ძალიან მალე გადაიარა.
– რთული ხასიათი გაქვთ?
– ვისთვის როგორ... რთული ხასიათი მაქვს.
– მაგალითად, ეს რითი გამოიხატება?
– ვერავინ გაიგებს, რა მინდა. ცვალებადი ხასიათი მაქვს, მაგრამ არა – საქმის მიმართ. ზოდიაქოს ნიშნით სასწორი ვარ და ეს ალბათ ამის ბრალიც არის. შეიძლება ვერ გაიგოთ, რა მინდა და ისე ვერ მომიდგეთ, როგორც საჭიროა. მამაკაცებს ჩემი გულგრილობა ცოტა აშინებთ.
ეკა ლემონჯავა
